Ҳәзирги ўақытта бул санаат аймағында 18 жойбар өз жумысын баслаған. Соның ишинде, «Sifat yogʻoch» жуўапкершилиги шекленген жәмийетте ҳәзирги ўақытта жүзге шамалас жигит-қызлар мийнет етпекте. Жумысшылар саны 150 ге жетип, толық қуўатлылық пенен исленсе, жылына 31 миллиард сумлық мебель өнимлери ислеп шығарылады.
Ушырасыў даўамында Наманганның ҳәр бир аймағында шөлкемлестирилген усындай өндирис кәрханаларының ўәлаят экономикасында айрықша орын ийелейтуғыны айтып өтилди.
Усы жылдың 21-майынан 21-июнине шекем Наманган қаласында дәстүрий түрде өткерип келинип атырған гөззалық әнжуманы – 62-Халықаралық гүллер фестивалы болып өтеди. Ҳәзирги ўақытта усы илажға қызғын таярлық көрилмекте.
Делегация ўәкиллери тийкарғы байрам илажлары өтетуғын Заҳириддин Муҳаммед Бабур атындағы мәденият ҳәм дем алыў бағында болып, фестивальға таярлық жумысларын көзден өткерди.
Бағдың барлық кеўилашар, сулыў орынлары жүзлеген гүллерден ибарат байрамға тән композициялар менен безетилип атырғанын айтып өтиў керек. Бирин-бири тәкирарламайтуғын гөззалық дөретпелери аралбойынан келген мийманлардың қызығыўшылығын арттырды.
Фестиваль өткерилетуғын тийкарғы орынлар ҳәм дыққатқа ылайық көше-парклерге 30 миллион түп гүл егиў жумыслары алып барылмақта. 300 түрдеги гүллерден жүзлеген композициялар жаратыў бойынша гүлши дизайнерлер мийнет етпекте.
Ҳақыйқатында да, Наманганның қолы гүл гүлшилери, абаданластырыў басқармасының пидайылары усы күнлери Қарақалпақстан Республикасында болып, тийкарғы көше ҳәм парклерди ойпатлық гүллери менен беземекте.
Қарақалпақстан Республикасы Жоқарғы Кеңеси Баслығы басшылығындағы делегацияның Наманган ўәлаятына сапары әмелий ушырасыўларға бай болды.
Қарақалпақстан хабар агентлиги
